漁業再生-Sakana Bacca

喺去中目黑Blue Bottle Cafe嘅途中，見到呢一間店舖，藍色底大大個魚字嘅logo容易入腦。名叫sakana bacca，原來佢背後有一個咁好嘅概念。

講起食魚一定會諗起日本，甚至乎諗起築地或者係豐州，但其實某程度上喺日本漁業都係一個夕陽工業。有好多時唔係每一種魚都可以賣得出去。對於生產者來講都係一個負擔。Sakana bacca可以話係一個社企，為左促進國內漁業發展，佢哋會連結唔同嘅魚店，為市場價格低嘅魚做加工，令一啲可能相對性比較冇咁受歡迎嘅魚款可以用其他方法賣出。例如呢幾個招牌嘅調味料就係啦。適合配搭唔同類型嘅魚，而且仲無任何化學調味料。另一個有趣位，原來呢啲醬油係由木桶中釀造，所以有只能在啤酒廠中找到的風味。

除咗產品之外，店舖設計，營銷都非常之摩登，就好似佢附近嘅Blue Bottle一樣，都係30歲時代女性會去嘅一個地方，而唔係街市，呢種產業再生，感覺有少少似中川政七rebrand嘅感覺。

佢哋暫時有五間店，位置都係遠離繁囂購物點，喺目黑、品川都有分店呢。不過其中位於中延嘅舖頭門面嘅裝修都有少少保留於魚店嘅特色。

其實日本仲有好多唔同嘅企業甚至乎係社企，佢哋會用創新嘅手法你去維持什至改善社會嘅運行模式。我哋往後會繼續為大家介紹更多呢類分享，請留意我地嘅電子報啦。